عزيزي مريض الكبد الدهني .. لحظة من فضلك
انت عارف انك لازم تتابع الموضوع ده ضروري ؟!
س : ليه بقى ؟!
ج: علشان موضوع الكبد الدهني ده خطير جداً !!!
س: إزاي يعني ؟!
ج: لأن الكبد الدهني قد يتطور ويتحول إلى تليف في الكبد وبالتالي أورام سرطانية بالكبد !!!
س: للدرجادي ؟!
ج: طبعاً .
س: وايه المطلوب يعني ؟
ج: اول حاجه اننا نشخص الموضوع عن طريق :
عمل موجات صوتية على البطن ونشوف شكل وحجم الكبد للتأكد انه كبد دهني .
س: وبعد ما نتأكد ؟
ج: لازم طبعاً نعمل مجموعة فحوصات طبية
مثل تحاليل الدهون الشاملة والسكر وقياس الضغط والوزن والطول
ووظائف الكبد لأن الموضوع مرتبط ببعضه !!
س: إزاي يعني؟!
يعني في الأغلب إللي عنده كبد دهني ممكن يبقى مريض سكر أو ضغط أو قلب .
س: وده أعراضه ايه؟!
مش لازم يكون ليه أعراض …
ج: ممكن تكون انسان طبيعي خالص ومبتشتكيش من اي حاجه وتكتشف الموضوع قدرا كده وانت بتعمل سونار لأي سبب.
أو ممكن يكون عندك شوية خمول أو همدان أو كسل ومحهودك بدأ يقل من غير سبب طبي واضح.
فلازم نعمل الحاجات السابقة دي مع أشعة جديدة كده اسمها فيبروسكان إللي هي بديل العينة الكبدية وبتقيس
درجة نشاط الكبد الدهني.
س: طيب وبعد ما نشخص الموضوع ؟!
لازم طبعاً نتعالج منه .
إزاي بقى ؟
ج: لازم طبعاً نظبط الوزن …باتباع نظام غذائي معين.
مع الرياضة…وعلاج الأعراض …ولو في ارتفاع في وظائف الكبد لازم طبعاً تتعالج.
مع المتابعة مع طبيب كبد متخصص كل فترة علشان نتجنب حدوث مضاعفات .
س: والموضوع ده بيتم فين بقى ؟!
ج: أي مكان متخصص …
عندنا مثلا عيادة في معهد الكبد الموجود في شارع القصر العيني في القاهره اسمها عيادة الكبد الدهني .
أو في العيادة الخاصة .
زي ما حضرتك تحب .
المهم تشرفنا لعمل اللازم…
الموضوع بسيط جدا….
ومشوار صغير…….هيوفر كتيييييير .
أدام الله عليكم نعمة الصحة والعافية
د.السيد إمام _ معهد الكبد بالقاهرة
