مختارات شعرية “حبر فاسد ” للشاعر سعدني السلاموني
كتب : عبدالناصر الدشناوى
كتاب جديد تحت عنوان ” حبر فاسد ” للشاعر سعدني السلاموني مختارات شعرية من اصدارات الهيئة المصرية العامة للكتاب .
وبهذا العمل قصيدة خاصة للشاعر أهداء الى زوجته ايمان وهي
مجنون ايمان
……………
روحها على وشها
القمر لما يطلع
بيطلع ليها
لما قرب منها
لقى الجن والعفاريت والشياطين
بتحبها
محاصرة حياتها
محاوطين جسمها
خرج روحه من صدره
وسكنها فىدمها
خرجت من ضلعه
اتولد من ضلعها
كل دا حصل
وانا طاير لها
………………………
مجنون ايمان
لا
هى اللى مجنونة بيه
لا
مجنونين ببعض
لا
ساكن فيها
ومسكونة بيه
لا
لا
…………….
الشياطين
والاشباح والبنى ادمين
حاوطونى من النحيتين
ارجع
ارجع
رايح فين
………………
مش راجع
انا اللى ممشى الارواح على العجين
ارواح البنات
والامهات
والنساوين
………………….
وف يوم
قمت من النوم
لقيت الارواح محاوطانى
لمتهم وحاطتهم قدامى
ووقفتهم طابورين
الارواح اتلخبطت
روحى راحت فين
……………….
دى روح مين
ودى روح مين
سودانين
على ايطالين
على فرنسوين
على لبنانين
على مصرين
روحى راحت فين
…………….
عيونى
قالت لى
روحك كانت على الفيس بوك من ساعتين
خطافتها روح بنت اسمها ايمان
علشان توصل لها
لازم تركب الزمان
وتخرج من الزمان
بالزمان
روحك صغيرة على روحها
روحك قد حباية الرومان
روحها اكبر من الاوطان
اتطمن ماتخافش على روحك
روحك
بترتاح فى حضن روح ايمان
……………..
قلت
ايه لعب العيال دا
روحى راحت فين
روحى اللى لمت الاكوان
تلمها روح انسان
…………………
اخرس خالص
روحك هربانة
من الذئاب البشرية
الاصدقاء
قبل الاعداء
روحك بريئة
بس قتالية
والحرب كر وفر
مش غشومية
ربنا بعت لك روح ايمان هدية
تحميك
من الايام السودة اللى راحت
والايام الاسود اللى جاية
مين
مين
مين
..افتح انا ايمان
باخبط عليك من ساعتين
هو فيه حد نايم لدلوقتى
