د.السيد إمام : يجيب عن مفاهيم مغلوطة عن أمراض الكبد و الفيروسات

المفاهيم المغلوطة عن أمراض الكبد: 

1_ يقولون: المرض ده ملوش علاج !!
ونقول قال رسول الله صلى الله عليه وسلم وهو من لا ينطق عن الهوى ( ما خلق الله من داء إلا جعل له دواء علمه من علمه وجهله من جهله…) أو كما قال صلى الله عليه وسلم. ما عليك الا ان تأخذ بالاسباب وعلى الله الشفاء.
2_ عاوز علاج بالاعشاب للفيروس والكبد!!
ونقول مفيش حاجة اسمها اعشاب للكبد او الفيروسات لاننا في مصر لم ندرس اعشاب ومعندناش كلية اعشاب. فكلها اجتهادات شخصية وتجارة واغلبها نصب واستغلال!
3_ أنا عندي فيروس سي والدكتور قاللي امنع أكل اللحوم والبروتين!!
ده غلط لو الموضوع لسه في أوله يبقى انت اسمك حامل للفيروس مش مريض كبد وبالتالي تاكل زي ما انت عاوز. احنا فقط بنمنع البروتين الحيواني عن مريض التليف والاستسقاء اثناء الغيبوبة الكبدية فقط وبعد كده بياكل على الاقل ثلاث مرات في الأسبوع لحوم.
4_ عندي اجسام مضادة لفيروس سي وعاوز اسافر والدكتور قاللي خد حقنة كورتيزون او اعشاب تخفيها اثناء التحليل!!
، غلط طبعاً الاجسام المضادة دي زي البصمة مش بتمشي ابداً ومش مضرة ومحدش يضحك عليك.
5_ عندي فيروس بي والدكتور قاللي خد علاج لمدة ثلاثة أشهر ونوقف وخلاص!!
مفيش حاجة اسمها كده، فيروس بي لا يعالج الا اذا كان نشط بمقاييس معينة لا يعرفها الا طبيب الكبد المتخصص. ولما نبدأ علاج لا نوقفه ابداً حتى لو اختفى الفيروس. لان العلاج بيخفي الفيروس من الدم فقط اما الفيروس بيعيش داخل خلايا الكبد ولحد الان مفيش علاج بيشيله.. فلازم نكمل على طول بالعلاج. مع المتابعة.
6_ رحت لدكتور وقاللي هديك حقنة من عندي تضيع الفيروس والتليف!!
، ده اكيد نصب لان العلاج مش اجتهاد شخصي واختراع حصري للدكتور وانما العلاج معروف وموجود بالصيدليات واللي يقول غير كده يبقى نصاب حتى لوكل الناس بتروحله ده مش مبرر.. ومفيش حاجة اسمها علاج عندي في عيادتي.
7_ الدكتور كتبلي دوا مستورد لعلاج التليف!!
اولا: مفيش علاج للتليف لو حصل انما فقط متابعة بالتحاليل والاشعات والافضل علاج الموضوع قبل حدوث تليف.
ثانياً: لو في حاجة زي كده اكيد كل الاطباء تعرفها وتنشر وتناقش في المؤتمرات.
8_ الفيروس ده بيتنقل عن طريق النفس !!
ونقول لا طبعاً الفيروسات لا تنقل إلا عن طريق الدم او بعض سوائل الجسم مثل السائل المنوي في حالة فيروس بي.
9_ ابني عنده فيروس ( أ) والدكتور قالي ياكل عسل ومربى بس!!
ونقول غلط طبعاً. لان فيروس ا ده بسيط جدا وليس له اكل معين ولا علاج معين وبيخف لوحده ولكن نعالج بعض الاعراض لو موجودة وموضوع انه يتعزل في البيت خالص ويمنع من الحركة خالص ده غلط ايضا. وبعدين اكل العسل والمربى ده معرفش جابوها منين!! والطفل يقعد يرجع منهم مش من المرض! وحاجة كمان الطفل ممكن يجيله سكر من كترهم لأن الكبد بيكون تعبان ودي حاجات تخزن فيه.
10_ زوجي لما عرف اني عندي فيروس طلقني!!! ونقول لا حول ولا قوة الا بالله اولا لو فيروس سي، نادر جداً انه ينقل عن طريق العلاقة الزوجية، ولو فيروس بي ممكن الطرف الثاني ياخد تطعيم ضده والمشكلة اتحلت وتعيشوا طبيعي. يبقى كان بيتلكك!!! ومصدق يخلع!!
11_ انا حامل وعندي فيروس سي او بي ودكتور النسا قالي لازم تنزليه!!!
ونقول ربنا يهديه اولا فيروس سي نادر جداً ينقل للجنين ولو حصل في الاغلب الاجسام المضادة بتتنقل عن طريق المشيمة وتظل في دم الطفل لفترة معينة وفي الاغلب تختفي. اما فيروس بي فممكن فعلا يتنقل ولكن اول ما الطفل يتولد نعطيه مصل المناعة والتطعيم. وبعدين كل شئ بقدر فلا يجوز قتل نفس من اجل احتمال. وحتى لو اتنقله الفيروس ممكن يتعالج منه ويعيش عادي.
12_ انا بغسل كلى وعندي فيروس سي او بي وقالوا حتى لو اتعالجت هيرجع تاني وملوش لازمه العلاج!!!
ونقول لا طبعا في علاج لفيروس سي وبي لمرضى الغسيل الكلوي وبدل ما يبقى عندك مرضين كفاية واحد وتتعالج من الفيروسات وتتنقل على مكن غسيل خالي من الفيروسات.

كل ما يجول في خاطرك…. سنجيب عنه بفضل الله وعونه.
فقط أنت تسأل ونحن نجيبك

مع تمنياتي للجميع بدوام الصحة والعافية
د.السيد إمام _ معهد الكبد بالقاهرة