تاريخ الجزيرتين ” صنافير وتيران ” من عصر الاسرة الخامسة حتى الان.

الخريطة

المهندس :أحمد محسن
( تيران وصنافير ) دول جزيرتين على مدخل خليج العقبة مساحتهم الاتنين 113 كيلوا متر مسطح .. وحاليا غير مأهولين بالسكان .. وبيمر منهم مضيق اسمه ( انتربرايز ) ما بين الحدود المصرية وجزيرة تيران .. وده اللي بتمر فيه السفن اللي رايحة اسرائيل والاردن والحدود المصرية عالعقبة .
ناخد بقى تاريخ الجزيرتين دول واحدة واحدة عشان نفهم أصل الحكاية .. وطول بالك معايا عشان هجيبهالك بالسحتوتة وبالحنتيرة .
في عصر الاسرة الخامسة ( 2510 – 2460 ق . م ) فيه ملك اسمه ( ساحورع ) ابن الملك ( أوسركاف ) ارسل حملة تأديبية لبدوا المنطقة دي عشان كانوا بينهبوا الحملات التجارية الجاية من الشام واليمن .. وأعلن أول سيادة لمصر على المنطقة دي (( اتخضيت طبعا اما قلتلك ساحورع في اول الكلام )) .
في عصر الاسرة 18 ( 1508 – 1458 ق . م ) رجع البدو يسرقوا وينهبوا تاني فبعتتلهم الملكة ( حتشبسوت ) وبعدها الملك ( تحتمس الثالث ) حملات تأديبية مرة تانية لفرض السيادة المصرية وانهاء السرقات ( مكتوبة كده في التاريخ حملات تاديبية ) .
في عهد البطالمة لم يهتموا أوي بفرض سيطرتهم على شبه جزيرة سينا بالكامل .. والخريطة المصرية في عهدهم تخلوا من المنطقة دي لصالح القبائل البدوية الشرقية ( عشان كان الاصل ثروات مصر اللي يسهل نهبها من البطالمة ) .
في العهد الروماني في القرن السادس الميلادي حصل أول استغلال لجزيرة ( تيران ) وسموها ( جوتاب ) وخلوها محطة الجمارك الامبراطوري لتحصيل الضرائب عن التجارة البحرية الجاية من الهند لبلاد الشام .. وفي عهد الملك ( جستنيان ) اقاموا منارة على رأس خليج العقبة وحط حامية من الجنود لادارة المكان (( وعملهم سكن هناك وبسطهم اخر انبساط ))

في العهد الفاطمي والايوبي والمملوكي والعثماني كانت منطقة الحجاز تابعة للسيادة المصرية بما فيهم جزيرتين تيران وصنافير .. لحد تأسيس الدولة السعودية الاولى عام 1744 م على يد الامير ( محمد بن سعود ) .. واللي فرض هيمنته على غالب مناطق المملكة المأهولة بالسكان ومن ضمنهم الحجاز واللي من ضمنهم برضه المنطقة اللي بنتكلم عنها .

في عهد ( محمد علي باشا ) وباللذات في سنة 1816 م ارسل ابنه ( ابراهيم باشا ) لاستعادة منطقة الحجاز ودحر نفوذ الدولة السعودية الاولى وقد كان له ما اراد وتم استعادة منطقة الحجاز بالكامل وضمها لملك ( محمد علي ) وولاده .. لكن بعد كده الدولة العثمانية فصلت اراضي الحجاز عن الدولة المصرية ومن ضمنهم الجزيرتين .. وفيه خرائط مصرية تعود لسنة 1897 بتوضح ده (( ابحث عنها هتلاقي مصر بلون والسعودية بلون )) .

سنة 1906 اتعملت معاهدة بين الدولة العثمانية ومصر وبريطانيا لترسيم حدود ملك مصر وملك الحجاز التابع للدولة العثمانية واعتمدت خرائط تحمل علامات من رقم ( 1 ) طابا الى رقم ( 91 ) جنوب العقبة .. واتقسمت المنطقة دي مابين الاردن والحجاز ومصر .. فحصل نزاعات بين قبائل بدوية كبرى على مناطق السيادة زي ( الترابين ) و ( الخلايفة ) و ( الحويطات ) وكانوا هم القبائل اللي معاها السيادة الفعلية للمكان ده لكن باسم الدول الثلاثة (( واللي راح السعودية منهم بقى سعودي واللي استنى في مصر بقى مصري !!! )))
*
18 ابريل 1906 تم اعلان تبعية منطقة ( أم الرشراش ) ( ايلات .. حاليا ) لمصر أو ( مدينة الحجاج ) كما كان يسميها المصريين .. ((( ووالله دي أولى نرجعها ))) .
في سنة 1916 معظم الناس في منطقة الحجاز دعموا ( الشريف حسين بن علي ) كحاكم فعلي لكامل المنطقة ولكن منطقة ( تيران ) و ( صنافير ) لم يكونا بالحسبان المصري ولا الحجازي (( محدش بصلهم )) .
*
لكن في نفس السنة في كتاب ( تاريخ سينا القديم والحديث وجغرافيتها ) لنعوم بك شقير الصادر عام 1916م تظهر تيران و صنافير جزر مصرية .
*
بعد تأسيس الدولة السعودية الثالثة في سنة 1932 م ابتدى ( الملك عبد العزيز ال سعود ) يجمع اطراف الدولة .. وتم بسط نفوذه على جزيرة تيران وصنافير وضمهم لمنطقة تبوك .. لكن في سنة 1950 طلب من مصر حمايتهم تخوفا من بسط اسرائيل نفوذها عليهم بعد حرب 1948 ولعدم وجود قوات بحرية سعودية مؤهلة للحماية .. ومصر والسعودية في 30 يناير عملوا مرسوم وارسلوه لبريطانيا ومن بعده مرسوم في 28 فبراير لامريكا .
*
في سنة 1956 احتلتهم اسرائيل ضمن العدوان الثلاثي على مصر .. وبعدين سابتهم .. فخدتهم السعودية ولكن الملك فيصل رجع اعطاهم للرئيس جمال عبد الناصر بصفة تأجيرية لقفل منفذ العقبة على اسرائيل .. وقد كان .
*
رجعت اسرائيل احتلتهم تاني في سنة 1967 وفضلت متحكمة فيهم لحد ما انسحبت منهم سنة 1982 ضمن فاعليات اتفاقية كامب ديفيد 1979م واقرت الاتفاقية انهم ضمن المنطقة ( ج ) وملكيتهم لمصر بشرط الا يتواجد فيهم قوات عسكرية مصرية .. وان تكون بسيادة قوات دولية .. فالسعودية على طول ارسلت للبعثات الدبلوماسية للامم المتحدة في جدة ان جزيرتين تيران وصنافير سعودية ومش مصرية .
*
في 20 فبراير 1982 صدر قرار 422 في صحيفة الوقائع المصرية ( الجريدة الرسمية للدولة ) يفيد بانشاء نقطة شرطة دائمة بجزيرة تيران وتتبع سانت كاترين .. (( لكن ان القرار اتنفذ ولا لأ فيه شكوك )) .
*
اسرائيل بعدها عملت مشكلة على وضع العلامات وباللذت العلامة ( 91 ) في طابا واتفقت مع مصر عالتحكيم الدولي وتم التحكيم في 11 سبتمبر 1986 بعودة طابا لمصر .. واقرت مصر قبلها في سنة 1983 ان تيران وصنافير وراس محمد محميات طبيعية بقوات دولية يحق لمصر والسعودية زيارتها دون استغلالها مدنيا ولا عسكريا .
*
سنة 1989 السعودية نشرت اصدار خريطة تظهر فيه تيران وصنافير ضمن الاراضي السعودية وارسلته للامم المتحدة .
*
في يناير 1990 رسمت مصر خريطة بقرار جمهوري ظهرت فيه تيران وصنافير ضمن الحدود المصرية .
*
سنة 2003 قدمت اسرائيل طلب لمصر لتفكيك اجهزة مراقبة على جزيرة تيران .. وارسل الجانب المصري للجانب الاسرائيلي ردا بعدم الاهلية للتنفيذ حيث ان الاجهزة سعودية ومش مصرية .
*
في سنة 2005 وخلال حوار صحفي نفى الرئيس السابق ( حسني مبارك ) أي علم له باشاعة منتشرة عن مشروع جسر مفترض بين مصر والسعودية عن طريق تيران وصنافير .
*
في سنة 2010 اصدر ( الملك عبد الله بن عبد العزيز ) مرسوما ملكيا بترسيم حدود بحرية للسعودية مع كل من مصر والاردن والسودان وارسل المرسوم للامم المتحدة .. فردت القاهرة ببيان غامض ان المرسوم الملكي لا يغير في المبحاثات المصرية السعودية بخصوص الجزيرتين .. وقالت مصر ان لها حق الاستغلال الاقتصادي لـ 200 ميل بحري طبقا لاتفاقية ترسيم المياة الاقتصادية بالامم المتحدة .
*
في سنة 2012 الباحث الاثري الدكتور / عبد الرحيم ريحان ( مدير عام البحوث والدراسات الاثرية والنشر العلمي بسيناء ) طالب باستغلال تيران سياحيا واثريا وثقافيا باعتبارها منطقة فريدة وبها كامل الامتيازات .. وده تم على الجانب السياحي وهناك وفود سياحية من شرم الشيخ للجزيرتين .. والتليفزيون المصري صور حلقة من برنامج ( مصر جميلة ) هناك .
*
في سنة 2013 كتاب الجغرافيا للصف السادس الابتدائي يقر ان ملكية تيران وصنافير لمصر .
*
في سنة 2014 اقرت الموسوعة السعودية ( أكبر موسوعة رسمية الكترونية للسعودية ) بأن تيران وصنافير سعوديتان خالصتان .
*
يوليو 2015 وقع وزير الدفاع السعودي والرئيس المصري على اتفاق القاهرة اللي البند 6 منه بيقر بضرورة تعيين الحدود البحرية بين البلدين .
*
08 ابريل 2016 تم توقيع اتفاقية بين الملك السعودي والرئيس المصري بأحقية السعودية بملكية جزيرة تيران وصنافير (( وقفلوا الباب على موضوع بقاله الاف السنين في جرة قلم ))
*
أخيرا :
طيب ليه ده كله واشمعنى جزيرة تيران وصنافير ؟
اقولك ان بالاضافة للموقع الاستراتيجي الهام للجزيرتين واللي بيشرف على سواحل بحرية لثلاث دول هم مصر واسرائيل والاردن .. الا انه في سنة 2012 م اعلن وزير البترول والثروة المعدنية السعودي اكتشاف حقل غاز على بعد 26 كيلو شمال ميناء ضبا بتبوك بالقرب من المنطقة المتنازع عليها .. حقل الغاز اكتشفته شركة ( ارامكو ) وقالت انه معدل التدفق فيه 10 مليون قدم مكعب يوميا على عمق 17.700 قدم .
*
المنطقة ( ج ) كانت لحد اول امبارح تشكل منطقة تواجد قوات دولية من 11 دولة قوامها 1900 جندي مع فتح نقطة مراقبة دولية باسم ( OP 3 -11 ) .. أما بعد الاتفاقية فعن حديث بعض الخبراء في صحف عالمية قالت ان كل ده ماعدش له لازمة ومفيش أي طرف هيأمنه غير الجانب السعودي مما يعني مغادرة القوات الدولية .. الا لو تدخلت اسرائيل .. وعلاقة النظام المصري حاليا باسرائيل ما يخلهاش تدخل .
*
الكلام على انشاء جسر عملاق يربط بين مصر والسعودية بقيمة 04 مليار وتنفيذه خلال 07 سنوات قابلته اسرائيل النهارده بالرفض (( اه .. الجزيرتين يكونوا بتوع مصر السعودية الجن الازرق بس ما تعطلش مصالح اسرائيل )) .. وكمان الناس الزايطة بصندوق الاستثمارات أبو 60 مليار ريال سعودي .. ده مش بسيولة نقدية بل بمشاريع طويلة الامد ( قد تكون او لا تكون ) .
*
((( الخلاصة : ايا كانت الجزيرتين سعودية ولا مصرية مش هايغير من الحقيقة الواضحة وضوح الشمس .. ان قيمة وهيبة مصر الدولية بتتاكل وتتلاشى .. والنظام المصري الحالي ظاهر جدا عليه ان ممكن يوافق على أي اتفاقيات شرط وجود اليد العليا اللي بتمد له يد العون أو يد أخرى ممكن تبطش بيه في يوم .. ولنا في اثيوبيا وايطاليا العبرة )))
*
المراجع :
الخرايط والمستندات وهنا هتلاقي الروابط للحكاية .
http://cutt.us/mo7sn-xSX
http://cutt.us/mo7sn-hSC
http://cutt.us/mo7sn-lyV
http://cutt.us/mo7sn-fbl
http://cutt.us/mo7sn-Pu9
http://cutt.us/mo7sn-GTy
http://cutt.us/mo7sn-Qtf
http://cutt.us/mo7sn-CfK
http://cutt.us/mo7sn-cfd
http://cutt.us/mo7sn-QVO
http://cutt.us/mo7sn-Nsh
http://cutt.us/mo7sn-0cC
http://cutt.us/mo7sn-loa
http://cutt.us/mo7sn-Iw2
http://cutt.us/mo7sn-wkX
http://cutt.us/mo7sn-6sp
http://cutt.us/mo7sn-EJ9
http://cutt.us/mo7sn-0lQ
http://cutt.us/mo7sn-yOX
http://cutt.us/mo7sn-2gS

اترك رد

%d