• :
  • :
أخر الأخبار

الحوار الجرئ….. في ارتجاع المرئ :

6 فبراير, 2020

س : السلام عليكم ورحمة الله وبركاته يا دكتور
ج: وعليكم السلام ورحمة الله وبركاته .
س : معلش يا دكتور عاوز بس صدرك يبقى واسع وتستحملني شوية وندردش في موضوع ارتجاع المرئ ده شوية .
ج: مفيش مشكلة خالص.
س: هو إيه أصلا ارتجاع المرئ ده ؟
ج: معناه ببساطة ارتجاع عصارة أو حامض المعدة أو حتى ارتجاع الأكل نفسه عكس اتجاه الجاذبية من المعدة إلى المريء !
س: وده من إيه بقى؟
ج: حاجات كتير منها ضعف العضلة العاصرة أو الصمام الوظيفي الموجود بين المعدة والمرئ والمفترض يقفل بعد نزول الأكل في المعدة . فتلاقي الفتحة إللي بين المعدة والمرئ واسعة شوية عن الطبيعي أو مفوته بمعنى أصح، فيحدث ارتجاع محتويات المعدة للمرئ.
س: وإيه بقى اللي بيزود الموضوع ده ؟
ج: حاجات كتير… منها زيادة الوزن خاصة منطقة البطن ( الكرش) ….والأكل والنوم مباشرةً…. وبعض الأكلات الحراقة والشطة …..والقهوة والشيكولاتة ! …. وممكن المسكنات…. وبعض أدوية الضغط والقلب، والتدخين طبعاً وممكن أحياناً التوتر والعصبية …… إلخ.
س : وإيه بقى أعراضه يا دكتور ؟
ج: حاجات كتير ممكن كلها أو بعض منها …زي :
ألم أو حرقان بالصدر ، مرارة بالفم، شرقة، احساس إن في طوبة واقفه في زورك .
وممكن كمان أعراض خارج الجهاز الهضمي تخليك تروح لدكتور صدر أو قلب أو انف واذن وحنجرة !!
س : إزاي يعني ؟!
ج: زي كحة ناشفة مستمرة وبتزيد عليك بالليل ، شرقة ، احساس بطبقة نفس ، إحساس بالموت !!
التهاب بالجيوب الأنفية… احساس بطعم مرارة بالفم أو تبقى ريحة بقك أو نفسك وحشة !!😢
بحة في الصوت…. إلتهاب الأذن أو الأسنان…. إلخ.
س : طيب وازاي نشخصه ؟
ج: عن طريق الأعراض دي وسماع التاريخ المرضي وفحص المريض . واستبعاد أسباب ألم الصدر الأخرى مثل مشاكل القلب وقصور الشريان التاجي ومشاكل الصدر والرئتين ….. إلخ.
س : سمعت إننا لازم نعمل منظار وكده ،ده صح ؟
ج: أحيانا طبعاً بنحتاج نعمل منظار علوي على المعدة والمرئ ده في الحالات المزمنة والتي لا تستجيب للعلاج
علشان نعرف درجة الارتجاع ونحدد إذا كان يكمل علاج دوائي فقط ولا هنحتاج أي تدخل جراحي ! ولمدة اد ايه هناخد العلاج ؟
وكمان نعرف اذا كان حصل تحور في خلايا بطانة المرئ ولا لأ .
س: يعني إيه تحور ؟
ج: إنها تقلب حاجه اسمها باريت إللي ممكن بعد كده تقلب أورام لا قدر الله !!
س : يااااه ! هي ممكن توصل لكده ؟!
ج: آه لو ترك بدون علاج واستمرت الأعراض فترات طويلة.
س: وايه موضوع الجراحة ده ؟
ج: نادر جدا إننا نلجأ للجراحة في الحالات المتطورة أوي والغير مستجيبة للعلاج فترات طويلة ومش نافع معها أي حاجة . فنضطر نعمل تضييق للفتحة دي .
س: وايه بقى علاج الموضوع ده ؟
ج: بص يا سيدي ,أهم حاجة في علاج ارتجاع المرئ
هو تغيير نمط حياة المريض
( lifestyle modification)
س : يعني إيه ؟
ج: يعني لو مدخن لازم يبطل تدخين. ولو بياكل وينام على طول لازم يوقف الموضوع ده , ولو وزنه زايد لازم وزنه ينزل ويقلل القهوة أو أفضل يوقفها .
ويحاول يرفع رأس السرير من قدام بحيث ينام ٤٥ درجة .
وكمان يقلل العصبية والتوتر لأنها بتزود حامض المعدة.
س : وبعدين ؟
ج: نكتب بقى بعض الأدوية إللي بتقلل حموضة المعدة واللي بتمنع الارتجاع نوعاً ما .
س : ودي بتتاخد لحد امتى ؟
ج: ممكن شهر ..اتنين.. ثلاثة أو حتى على طول !!
س : معقولة ؟!
ج: آه والله لأنه مزمن نوعاً ما وممكن يخف خالص
إنتى بقى ونصيبك .
س: بس يا دكتور أنا أخدت أدوية كتير ورحت لدكاترة كتير ومفيش فايده !! أعمل إيه ؟!
ج: لازم طبعاً نراجع التشخيص كويس ونعمل منظار علوي
مع اتباع التعليمات والنظام الغذائي يحدث الشفاء بإذن الله.
س : يعني ممكن أخف منه كده وأرجع طبيعي وآكل كل حاجه ؟
ج: وارد جداً طبعاً ، بس لازم الحفاظ على اتباع بعض التعليمات السابقة وتستعين بالله وتاخد بالأسباب مع كثرة الاستغفار و الدعاء وإخراج صدقة بنية الشفاء لقول النبي صلى الله عليه وسلم ( داووا مرضاكم بالصدقة ) .

س : شكراً جزيلا يا دكتور تعبتك معايا .
ج: لا أبدا متعك الله بنعمة الصحة والعافية.

ياريت بقى ننشر الكلام ده ونفيد بيه غيرنا لعلها تكون صدقة جارية أو علم ينتفع به.

ملحوظة : مينفعش نكتب علاج عن طريق الفيسبوك فلابد من فحص المريض وسماع التاريخ المرضي
لأن كل حالة ربما تختلف في مسبباتها وأعراضها عن التانية فتابع مع أقرب طبيب جهاز هضمي ليك أو تشرفني أنا شخصياً في :

عيادة الجهاز الهضمي والقولون التقرحي يوم الإثنين الساعة التاسعة صباحاً بالمعهد القومي للكبد بالقاهرة مجانا تماما .

مع تمنياتي للجميع بدوام الصحة والعافية
د.السيد إمام


أحدث الأخبار